AQSh prezidenti Donald Tramp 2026 yilning yanvar oyida G‘azo Tinchlik kengashiga a’zo bo‘ladigan davlatlar ro‘yxati aniqlanib, e’lon qilinishi rejalashtirilayotgani haqida ma’lumot berdi. Bu haqda Zamin.uz xabar berdi.
Ushbu bayonot 2025 yil 9 dekabr kuni Oq uyda o‘tkazilgan tadbirda berilgan. Trampning so‘zlariga ko‘ra, G‘azo sulhi doirasida tashkil etilgan bu kengashga dunyoning ko‘plab yetakchi davlatlari qiziqish bildirmoqda.
“Bu tarixdagi eng muhim kengashlardan biri bo‘ladi, barchaning unda ishtirok etishni istayotganini ko‘rmoqdamiz”, dedi Tramp. BMT Xavfsizlik kengashi tomonidan 2025 yil 17 noyabrda qabul qilingan rezolyutsiyaga ko‘ra, Tinchlik kengashiga a’zo davlatlarga Xalqaro Barqarorlashtirish kuchlarini shakllantirish va ularni G‘azoga joylashtirishga ruxsat berilgan.
Ushbu kengashning asosiy vazifasi G‘azoni qayta tiklash va uning rivojlanish yo‘nalishini belgilashdan iborat bo‘ladi. Rezolyutsiyada kengash faoliyati Falastin ma’muriyati o‘z islohot dasturini muvaffaqiyatli yakunlab, G‘azoni xavfsiz va samarali boshqarish imkoniyatiga ega bo‘lguniga qadar davom etishi ko‘rsatilgan.
Hozirda xalqaro vositachilar yordamida Isroil va Hamas o‘rtasidagi tinchlik jarayoni amalga oshirilmoqda. Sulhning ikkinchi bosqichi, ya’ni Hamas tomonidan G‘azoda qolgan jasadlar topilib, qaytarilgandan so‘ng boshlanishi rejalashtirilgan.
Bu jarayon mintaqadagi barqarorlikni mustahkamlash yo‘lida muhim qadam bo‘lishi kutilmoqda.
