Yovvoyi maymun Tailandda inson hayotiga zomin bo‘ldi
Tailandning Yala provinsiyasidagi bir qishloqda yovvoyi makaka maymuni 63 yoshli fuqaroning hayotiga zomin bo‘ldi. Bu haqda Zamin.uz xabar berdi.
Ushbu voqea haqida The Independent xabar berdi. Mahalliy manbalarning ma’lum qilishicha, marhum Chaipxum Sae-eungning jasadi o‘z uyida devorga suyanib qolgan holda topilgan.
Uning tanasida maymunning tishlash va tirnash izlari aniqlangan. Hodisa tafsilotlariga ko‘ra, maymun bir necha hafta davomida qishloq aholisi va ayniqsa, marhumga nisbatan tajovuzkor harakatlar qilgan.
Voqeadan avvalroq, maymun Sae-eungning yelkasidan tishlab, og‘ir jarohatlar yetkazgan. Qishloq aholisi hayvonning urushqoq xatti-harakatlari tufayli hatto bir oilaning o‘z uyini tark etishga majbur bo‘lganini aytishgan.
Marhumning jasadini uning jiyani Pipat Sae-eung topgan. U amakisining jasadi yonida qon izlari va himoya qilish uchun ishlatilgan metal tayoq bo‘lganini ko‘rgan.
Pipatning so‘zlariga ko‘ra, maymun erkakning turli joylarini tishlab, tirnagan, hatto oyog‘ining bir qismini uzib olgan. Hodisa joyiga kelgan politsiya vaziyatni o‘rgangan.
Maymun hodisa vaqtida uy tomiga chiqib olgani aniqlangan. Mayor Jakkarin Laksananing ma’lum qilishicha, xavfni bartaraf etish maqsadida maymunni otib o‘ldirishga qaror qilingan.
Dastlabki tergov natijalariga ko‘ra, marhumning jasadi 2-3 kun avval vafot etgan bo‘lishi mumkinligi taxmin qilinmoqda. Uning jasadi o‘lim sababini aniqlash uchun Betong kasalxonasiga yuborilgan.
Politsiya hodisada inson aralashuvi bo‘lmaganini aniqlashga harakat qilmoqda.
