Rossiya Federatsiyasi Davlat Dumasining chet davlatlar aralashuvini tergov qilish bo‘yicha komissiyasi mamlakat tashqarisida bo‘lib, Rossiyada jinoiy yoki ma’muriy javobgarlikka tortilgan fuqarolarga nisbatan yangi cheklovlarni joriy etuvchi qonun loyihalarini tayyorlamoqda. Bu haqda Zamin.uz xabar berdi.
Bu haqda komissiya 11-dekabr kuni o‘zining rasmiy kanali orqali ma’lum qildi. Tayyorlanayotgan bu choralar, asosan, siyosiy motivlarga asoslangan huquqbuzarliklar uchun javobgarlikka tortilgan fuqarolarga nisbatan qo‘llanilishi rejalashtirilmoqda.
Bunga quyidagilar kiradi: “chet el agenti” maqomidagi faoliyatni tartibga soluvchi qonun talablarini buzish, Rossiya hududiy yaxlitligiga da’vat qilish, Rossiyaga qarshi sanksiyalarni qo‘llashga chaqiriqlar, Rossiya Qurolli kuchlarini obro‘sizlantirish, shuningdek, “nomaqbul” tashkilotlar faoliyatida ishtirok etish. Loyiha doirasida taklif etilgan cheklovlar ro‘yxati keng qamrovli.
Jumladan, chet elda yashayotgan rossiyaliklar uchun tadbirkorlik faoliyatini yuritish, ko‘chmas mulk va transport vositalarini ro‘yxatdan o‘tkazish, haydovchilik guvohnomasidan foydalanish cheklanadi. Shuningdek, davlat xizmatlari va bank amaliyotlaridan foydalanish imkoniyati ham to‘xtatiladi.
Pul mablag‘lari muzlatib qo‘yilishi va ishonchnoma orqali bitimlar amalga oshirish taqiqlanishi ko‘zda tutilgan. Cheklovlar Rossiya Federatsiyasi Bosh prokurori yoki uning o‘rinbosari qarori asosida joriy etiladi.
Mazkur shaxslarning ismlari maxsus ommaviy reestrga kiritilib, internetda e’lon qilinadi. Bundan tashqari, ayrim konsullik xizmatlari ko‘rsatilmasligi ham nazarda tutilgan.
Yurist Anastasiya Burakovaning fikricha, bu qonun ma’muriy javobgarlikka tortilgan fuqarolarni deyarli jinoiy javobgarlikdagi shaxslar bilan tenglashtiradi. U ushbu qonun qabul qilinsa, ayrim rossiyalik muhojirlarning amalda fuqarolikdan mahrum bo‘lish holatlari kuchayishini ta’kidlab o‘tgan.
Natijada, shaxsni tasdiqlovchi hujjati bo‘lmagan odamlar soni ortishi xavfi mavjud.
