Afg‘oniston fuqarolariga xorijda jang qilish taqiqlandi
Afg‘oniston hukumati o‘z fuqarolarining xorijda jangovar harakatlarda qatnashishini qat’iyan taqiqladi. Bu haqda Zamin.uz xabar berdi.
Bu haqda Afg‘oniston tashqi ishlar vaziri Amir Xon Muttaqiy TOLONews nashriga bergan intervyusida ma’lum qildi. Muttaqiyning so‘zlariga ko‘ra, mamlakat xavfsizligini ta’minlash faqat mudofaa va ichki ishlar vazirliklari yoki xavfsizlik kuchlarining emas, balki har bir fuqaroning burchidir.
U Afg‘oniston hududi boshqa davlatlarga qarshi harbiy maqsadlarda ishlatilmasligi lozimligini ta’kidladi. Shuningdek, hukumat hech bir shaxsga xorijda jangovar harakatlarda ishtirok etishga ruxsat bermasligini va ushbu qoidani buzganlar qonuniy javobgarlikka tortilishini bildirdi.
Diniy yetakchilar ham hukumatni Afg‘onistonning chet eldagi mojarolarga aralashuviga yo‘l qo‘ymaslikka chaqirdi. Ular xorijda jangovar harakatlarda qatnashgan shaxslarni qat’iy jazolash zarurligini ta’kidlab o‘tishdi.
Mamlakat rahbariyati bu borada qat’iy choralar ko‘rishni rejalashtirgan.
