Qirg‘iziston sudlari o‘lim jazosini tiklashni rad etdi

Qirg‘iziston Konstitutsiyaviy sudi mamlakat prezidenti Sadir Japarovning o‘lim jazosini qayta tiklash bo‘yicha tashabbusini rad etdi. Bu haqda Zamin.uz xabar berdi.

Prezident ma’muriyati og‘ir jinoyatlar, jumladan, bolalarni zo‘rlash va qotillik holatlari uchun oliy jazo chorasini qaytarish maqsadida qonun loyihasini Konstitutsiyaviy sudga taqdim etgan edi. Sudning rasmiy bayonotida qayd etilishicha, taklif etilgan o‘zgartirish mamlakat Konstitutsiyasiga zid hisoblanadi.

Qirg‘iziston Konstitutsiyasida inson huquqlari oliy qadriyat sifatida mustahkamlangan va yashash huquqi ustuvor ahamiyatga ega. O‘lim jazosini bekor qilish inson huquqlarini himoya qilishning muhim qismi hisoblanadi.

Shuningdek, sud xalqaro huquqiy me’yorlarga e’tibor qaratib, Qirg‘iziston xalqaro majburiyatlarga rioya etishini eslatdi. Xalqaro huquqning umume’tirof etilgan qoidalari mamlakat huquqiy tizimining ajralmas qismi bo‘lib, davlat ularga amal qilish majburiyatini olgan.

Shu sababli, o‘lim jazosini tiklash Asosiy qonunga zid va yuridik jihatdan imkonsizdir. Shuningdek, qonun loyihasini referendumga qo‘yish ham mumkin emasligi ta’kidlandi.

Sud qaroriga ko‘ra, ushbu tashabbusni targ‘ib qilish bilan bog‘liq barcha harakatlar to‘xtatiladi. Ushbu tashabbus prezident Japarov tomonidan joriy yilning oktyabr oyida sodir bo‘lgan jiddiy jinoyat — 17 yoshli Oysuluv ismli qizning o‘ldirilishi sababli ilgari surilgan edi.

Ma’lum qilinishicha, qiz o‘g‘irlab ketilib, zo‘rlangan va keyinchalik shafqatsizlarcha o‘ldirilgan. Ushbu dahshatli hodisa jamiyatda katta rezonans uyg‘otdi.

Qirg‘izistonda o‘lim jazosi 2007 yilda bekor qilingan edi. So‘nggi yillarda voyaga yetmaganlarga nisbatan jinoyatlar, jumladan, zo‘rlash va qotillik holatlarining ko‘payishi natijasida oliy jazoni qaytarish masalasi keng muhokamalarga sabab bo‘lmoqda.

Biroq Konstitutsiyaviy sudning qarori bu masalaga yakuniy nuqta qo‘ydi.