Belgiyalik 15 yoshli Loran Simons ikkinchi doktorlik darajasini qo‘lga kiritdi. Bu haqda Zamin.uz xabar berdi.
U dastlab 12 yoshida birinchi doktorlik dissertatsiyasini himoya qilgan edi. Bu haqda Bild nashri xabar bergan.
Ma’lum bo‘lishicha, Loran sakkiz yoshida maktabni tamomlagan, 11 yoshida esa magistratura darajasini qo‘lga kiritgan. Hozirda u Germaniyaning Myunxen shahridagi Gelmgolts markazida uchinchi ilmiy darajasi ustida tadqiqot olib bormoqda.
Uning ilmiy ishlari tibbiyot va sun’iy intellektni integratsiya qilishga qaratilgan. Loranning so‘nggi dissertatsiyasi nazariy kvant fizikasini o‘rganishga bag‘ishlangan.
Bungacha u eksperimental fizika bo‘yicha tadqiqot olib borgan. Loran o‘z muvaffaqiyatlarini fotografik xotirasi va murakkab muammolarni tez tahlil qilish qobiliyati bilan izohlaydi.
Loran Simonsning ota-onasi uning g‘ayrioddiy qobiliyatlari bolaligida namoyon bo‘lganini ta’kidlaydi. U to‘rt yoshida maktabga borgan, olti yoshida gimnaziyaga kirgan, sakkiz yoshida imtihon topshirib, to‘qqiz yoshida universitetga qabul qilingan.
12 yoshida esa Maks Plank institutidagi eng yosh doktorantlardan biri bo‘lgan. Loran shuningdek, Rim papasi bilan uchrashgan, Nobel mukofoti sovrindorlari bilan muloqot qilgan va dunyoning yetakchi ilmiy markazlarida ma’ruzalar o‘qigan.
Shaxsiy hayotida esa Loran oddiy yosh bolalar kabi qiziqishlarga ega. U kartingda uchishni, Marvel filmlarini tomosha qilishni va videoo‘yinlar o‘ynashni yoqtiradi.
Bundan tashqari, u musiqa tinglab, raqsga tushishni xush ko‘radi. “Do‘stlarim bilan oddiy odamdek vaqt o‘tkazaman”, deydi u.
