AQSH va Malayziyada kuchli yomg‘irlar suv toshqinlariga sabab bo‘ldi
11-dekabr kuni Tinch okeanining shimoli-g‘arbiy hududida yog‘gan kuchli yomg‘irlar AQSHning bir nechta shtatida suv toshqinlariga olib keldi. Bu haqda Zamin.uz xabar berdi.
Ushbu tabiiy ofat natijasida ko‘plab yo‘llar yopildi, temiryo‘l liniyalari faoliyati to‘xtadi va o‘n minglab odamlar xavfsiz joylarga evakuatsiya qilindi. AQSH Milliy ob-havo xizmati ma’lumotiga ko‘ra, G‘arbiy Vashington shtati suv toshqinlarining asosiy markaziga aylangan.
Kaskad va Olimpiya tog‘lari, Puget-Saund hududi hamda Oregon shtatining shimoliy qismi suv toshqinlari xavfi haqida ogohlantirildi. Tabiiy ofatning sababi Tinch okeanidan kelgan kuchli bo‘ron tizimi bo‘lib, bu hodisa atmosfera daryosi nomi bilan ataladi.
Ushbu bo‘ron haftaning boshida jala yomg‘irlar yog‘ishiga sabab bo‘ldi. U Oregonning shimolidan boshlab Vashington shtati, Kanada, Britaniya Kolumbiyasi, Montananing g‘arbiy qismi va Aydaho shimoligacha tarqaldi.
Natijada, keng ko‘lamli suv toshqinlari yuzaga keldi. Vashington shtatining g‘arbiy qismida taxminan 100 ming aholi uchun "3-darajali evakuatsiya" e’lon qilindi.
Evakuatsiya asosan Sietl shahri yaqinidagi Skadjit okrugida yashovchi qishloq aholisi o‘rtasida amalga oshirildi. Bundan tashqari, Malayziyada ham kuchli yomg‘irlar sababli suv toshqinlari yuzaga kelgani va 11 mingdan ortiq odam zarar ko‘rgani haqida xabar berildi.
