Pokistonda hibsga olingan o‘zbekistonlikka elchixona yordam bermoqda
O‘zbekistonning Pokistondagi elchixonasi xodimlari Karachi shahridagi Markaziy ayollar qamoqxonasiga tashrif buyurib, u yerda saqlanayotgan o‘zbekistonlik fuqaro bilan uchrashdi. Bu haqda Zamin.uz xabar berdi.
Ushbu tashrif fuqaroning murojaati asosida amalga oshirilib, uning holati va sud jarayoni diqqat bilan o‘rganilmoqda. Ma’lum bo‘lishicha, fuqaro 2024 yil dekabr oyida Maldiv orollari fuqarosi bo‘lgan turmush o‘rtog‘i bilan Pokistonga kelib, tadbirkorlik faoliyatini yo‘lga qo‘yishni rejalashtirgan.
Biroq, 2025 yil yanvar oyida u turmush o‘rtog‘i bilan birga giyohvand moddalar savdosida gumonlanib hibsga olingan va qamoqxonaga joylashtirilgan. Hozirda ushbu ish bo‘yicha sud jarayoni davom etmoqda.
Fuqaro elchixonaga yo‘llagan murojaatida o‘zining aybsiz ekanini ta’kidlab, yordam so‘ragan. Uning so‘zlariga ko‘ra, turmush o‘rtog‘ining yolg‘on va’dalariga ishonib, bu mamlakatga kelgan va giyohvand moddalar savdosiga aloqador emas.
Shundan so‘ng elchixona xodimlari fuqaro bilan bir necha bor uchrashib, tergov tafsilotlarini o‘rgangan va sud jarayonini kuzatishni davom ettirmoqda. Diplomatlarning aralashuvi natijasida ishga xolis yondashuv ta’minlanayotgani qayd etilgan.
Fuqaroning himoyasini yaxshilash maqsadida konsullik maslahatlari berilgan va yangi advokat yollangan. Dastlabki advokatning sust ishlagani sababli yangi himoyachi jalb qilingan, u esa fuqaroning ozodlikka chiqish ehtimoli yuqori ekanini bildirgan.
Shuningdek, faol vatandoshlar ko‘magida fuqaro oziq-ovqat, kiyim-kechak va pul mablag‘i bilan ta’minlangan. Elchixona xodimlari qamoqxona rahbariyati bilan ham muzokaralar olib borib, fuqaroning huquqlarini kengaytirish, yaqinlari bilan muloqot qilish, advokat bilan uchrashish va tibbiy xizmatlardan foydalanish kabi masalalarni muhokama qilgan.
Shuningdek, uni yaqin orada O‘zbekistonga qaytarish imkoniyatlari ham ko‘rib chiqilgan.
