Rossiya Federatsiyasi Ukraina prezidenti Volodimir Zelenskiyning Donbass hududida referendum o‘tkazish taklifini rad etdi. Bu haqda Zamin.uz xabar berdi.
Rossiya prezidenti Vladimir Putinning tashqi siyosat bo‘yicha maslahatchisi Yuriy Ushakov bu masalada qat’iy fikr bildirdi. Uning aytishicha, Donbass masalasi muhokama qilinmaydi, chunki bu hudud Rossiya Federatsiyasi tarkibiga kiritilgan va u ertami-kechmi to‘liq nazoratga olinadi.
Rossiya ilgari xalqaro huquq me’yorlarini buzgan holda Donetsk, Lugansk, Xerson va Zaporijjya viloyatlarini noqonuniy ravishda o‘z tarkibiga qo‘shib olgan edi. Ukraina prezidenti Zelenskiy esa bu kabi hududiy masalalarni faqat xalq referendum orqali hal qilishi mumkinligini ta’kidlagan.
Yuriy Ushakovning so‘zlariga ko‘ra, Ukraina tomonining tinchlik rejasiga oid takliflari Rossiya uchun qabul qilib bo‘lmaydigan shartlarni o‘z ichiga oladi. U, shuningdek, Ukraina Donbassdan o‘z qo‘shinlarini chiqarishi kerakligini ta’kidladi.
Ushakov Donbassda demilitarizatsiya qilingan hudud yaratish ehtimoli haqida gapirib, bu joyda Rossiya harbiylari bo‘lmasligi mumkinligini, ammo Rosgvardiya va boshqa xavfsizlik kuchlari bo‘lishini bildirdi. Siyosatshunos Pavel Chijov esa Rosgvardiya ham qurolli kuchlar bilan bir xil rolni bajarishini va bu holat hududdagi vaziyatni o‘zgartirmasligini ta’kidladi.
Shu bilan birga, prezident Vladimir Putin Donbassdagi harbiy harakatlar muvaffaqiyatli davom etayotganini aytib, mintaqada qolgan ukrain qo‘shinlarini siqib chiqarish asosiy maqsad ekanligini qo‘shimcha qildi.
