Eyvon va Somerset politsiyasi Bristol shahridagi muzey omboridan madaniy boyliklarning katta miqdorda o‘g‘irlanishi bo‘yicha tergov o‘tkazmoqda. Bu haqda Zamin.uz xabar berdi.
Jinoyatchilar Britaniya imperiyasi va Hamdo‘stlik tarixiga oid 600 dan ortiq artefaktni o‘g‘irlab ketganlikda gumon qilinmoqda. Bu haqda CNN xabar berdi.
Mazkur jinoyat 25-sentyabr kuni tongda sodir bo‘lgan. Huquq-tartibot idoralari qidiruvdagi to‘rt shaxsning suratlarini jamoatchilikka e’lon qilib, ular haqida ma’lumot berishda yordam so‘ragan.
Tergovchilar o‘g‘irlangan buyumlar muhim madaniy ahamiyatga ega bo‘lib, ularning ko‘pchiligi muzeyga hadya qilinganini ta’kidlashdi. Detektiv konstebl Den Burganning so‘zlariga ko‘ra, bu hodisa Bristol shahri uchun sezilarli yo‘qotish hisoblanadi.
"Bu artefaktlar Britaniya tarixining murakkab va ko‘p qatlamli jihatlarini anglashimizga yordam beruvchi muhim to‘plamning bir qismi edi. Biz jamoatchilikning yordamiga tayanamiz va aybdorlarni topishda qo‘llab-quvvatlashlarini kutamiz", dedi u.
Bi-bi-si xabariga ko‘ra, o‘g‘irlangan buyumlar orasida Ost-Indiya kompaniyasi davridagi harbiy nishonlar, zargarlik buyumlari, o‘yma haykalchalar va boshqa bezak ashyolari mavjud. Ushbu voqea madaniy merosni himoya qilish masalasiga jiddiy e’tibor qaratish zarurligini yana bir bor ko‘rsatmoqda.
