Kanadaliklar AQShga emas, boshqa davlatlarga sayohat qilmoqda
Ko‘plab kanadaliklar AQShga sayohat qilishdan bosh tortmoqda. Bu haqda Zamin.uz xabar berdi.
Bunga sabab sifatida ikki davlat o‘rtasidagi siyosiy munosabatlarning tarangligi hamda AQShning Kanada mahsulotlariga qo‘llayotgan tariflari ko‘rsatilmoqda. 2025-yilning boshidan buyon Kanadadan AQShga tashriflar 23 foizga kamaygan.
Bu holat AQSh iqtisodiyotiga qariyb 4 milliard dollar miqdorida zarar yetkazgan. Kanadaliklar AQShga borish o‘rniga, o‘z mamlakatlarini o‘rganishga yoki boshqa xorijiy davlatlarga sayohat qilishga e’tibor qaratmoqda.
Kanada statistika idorasi ma’lumotlariga ko‘ra, 2025-yilda ichki sayohatlar sezilarli darajada oshgan. Bundan tashqari, Meksika, Portugaliya, Bahamalar va Beliz kabi davlatlarga tashriflar ham ko‘paygan.
Air Canada aviakompaniyasi Yevropa, Karib dengizi, Markaziy va Janubiy Amerikaga qo‘shimcha reyslar tashkil etmoqda. Ushbu yangi yo‘nalishlar orqali kanadaliklar AQSh orqali o‘tmasdan boshqa davlatlarga osonroq sayohat qilish imkoniyatiga ega bo‘lmoqda.
Bu esa turizmni diversifikatsiya qilishga va boshqa mamlakatlarda turizm sohasini rivojlantirishga yordam bermoqda. AQShning kanadalik sayyohlar hisobiga daromad oladigan hududlari ushbu o‘zgarishni sezmoqda.
Sayohat bo‘yicha ekspertlar bu tendensiya davom etishi mumkinligini ta’kidlashmoqda. Shuningdek, ular kanadaliklarni o‘z mamlakatlarini kashf qilishga va xorijiy sayohatlarini yanada kengaytirishga undamoqda.
