Berlinda Ukraina bo‘yicha muhim tinchlik muzokaralari o‘tkazildi
Berlinda Ukraina prezidenti Volodimir Zelenskiy va boshqa xalqaro siyosiy vakillar ishtirokida muhim muzokaralar o‘tkazildi. Bu haqda Zamin.uz xabar berdi.
Unda Rossiya tomonidan boshlangan jangovar harakatlarni to‘xtatish masalasi muhokama qilindi. Muzokaralar davomida sezilarli natijalarga erishilgani haqida AQSH prezidenti maxsus vakili Stiven Uitkoff ma’lum qildi.
Uitkoffning so‘zlariga ko‘ra, o‘t ochishni to‘xtatish bo‘yicha AQSH va Ukraina delegatsiyalari o‘rtasidagi maslahatlashuvlar besh soatdan ortiq davom etdi. Muzokaralarda AQSH prezidenti maslahatchisi Jared Kushner ham ishtirok etdi.
Tomonlar tinchlikka erishish uchun 20 banddan iborat yo‘l xaritasi, iqtisodiy masalalar va xavfsizlik bo‘yicha muhim yo‘nalishlarni muhokama qilishdi. Germaniya kansleri Fridrix Mers ham uchrashuvda qatnashdi, biroq keyinroq vakilini qoldirgan holda muzokaralarni tark etdi.
Fridrix Mers ijtimoiy tarmoqda: “Biz Ukrainada barqaror va adolatli tinchlikni ta’minlashni istaymiz. Jarayon qiyin bo‘lsa-da, biz bunga erishishda qat’iyatlimiz”, deya fikr bildirdi.
15-dekabr kuni muzokaralar davom ettirilishi rejalashtirilgan. AFP agentligiga ko‘ra, kechki paytda Yevropa davlatlari rahbarlari, shuningdek, Yevropa Ittifoqi va NATO vakillari ham muzokaralarga qo‘shilishi kutilmoqda.
Reuters agentligi xabariga ko‘ra, Zelenskiy jurnalistlar bilan yopiq uchrashuvda tinchlikka erishish uchun muayyan murosalarga tayyor ekanini bildirdi. Xususan, Ukraina NATOga a’zo bo‘lish o‘rniga AQSH va Yevropa davlatlari tomonidan xavfsizlik kafolatlarini olish ehtimolini ko‘rib chiqmoqda.
Shuningdek, u front chizig‘idagi jang harakatlarini muzlatishni adolatli yechim deb atadi. Rossiya tomoni esa avvaldan Donesk va Lugansk viloyatlarining ayrim hududlaridan Ukraina qo‘shinlarini olib chiqishni talab qilib kelmoqda.
Berlindagi ushbu muzokaralar uzoq davom etayotgan ziddiyatlarni siyosiy yo‘l bilan hal qilishga qaratilgan muhim qadam sifatida baholanmoqda.
