Britaniya Milliy sog‘liqni saqlash xizmati shifokori Debora Lining ta’kidlashicha, yonboshlab uxlash, ya’ni embrion yoki “qalamcha” holati, sog‘lom uyqu uchun eng foydali holatlardan biri hisoblanadi. Bu haqda Zamin.uz xabar berdi.
Bu holat umurtqa pog‘onasiga tushadigan bosimni kamaytirib, qon aylanishini yaxshilaydi va kislotali refluks belgilarini yengillashtiradi. Mutaxassislarning fikriga ko‘ra, tana va bosh bir tomonga qaratilgan holda uxlash bo‘g‘imlarga tushadigan yukni pasaytiradi, belning to‘g‘ri tuzilishini saqlaydi va uyqu vaqtida yuzaga keladigan og‘riqlarni oldini oladi.
Meyo klinikasi ma’lumotlariga ko‘ra, bu holat ichki a’zolarga tushadigan bosimni kamaytirib, qon aylanishining yaxshilanishiga yordam beradi. Embrion holatida, ya’ni tizzalarni ko‘krakka biroz tortgan holda uxlash, xurrakni kamaytiradi.
Bu ayniqsa homilador ayollar va bel og‘rig‘iga moyil kishilar uchun qulaydir. Biroq tana haddan ortiq bukilsa, nafas olish qiyinlashishi yoki bo‘g‘imlarda qotish hissi paydo bo‘lishi mumkin.
Eng tavsiya etilmaydigan holatlardan biri chalqancha, ya’ni “askar” holatidir. Bu holat nafas buzilishi (apnoe) xavfini oshirishi va kislotali refluksni kuchaytirishi mumkin.
Agar bu holatda yostiq juda past bo‘lsa, vaziyat yanada yomonlashadi. Shifokorlar, agar chalqancha yotishga to‘g‘ri kelsa, tizza ostiga kichik yostiq qo‘yishni tavsiya qiladilar.
Bu beldagi bosimni yumshatadi. Yelkada noqulaylik bo‘lsa, qo‘llar yonga yozilgan “dengiz yulduzi” holati qulaylik yaratishi mumkin.
