Moskva viloyatining Odinsovo tumanidagi Uspenskiy nomli umumta’lim maktabida og‘ir jinoyat sodir bo‘ldi. Bu haqda Zamin.uz xabar berdi.
Gorki-2 posyolkasida joylashgan maktabga 9-sinfda o‘qiydigan 15 yoshli o‘smir pichoq bilan kirib kelib, o‘quvchilarga hujum qilgan. Natijada 10 yoshli to‘rtinchi sinf o‘quvchisi halok bo‘ldi.
Hujum qilgan o‘smir, Timofey K., qo‘lga olingan. Tergov qo‘mitasi ma’lumotiga ko‘ra, hujum vaqtida gumonlanuvchi o‘z harakatlarini videoga olgan va uni shaxsiy telegram-kanaliga joylashtirgan.
Videoda u millat haqida so‘roq qilgani, shuningdek, maktab qo‘riqchisini yaralab, o‘quvchilarga hujum qilgani aks etgan. Gumonlanuvchi sinfdoshlariga hujumdan avval “Mening g‘azabim” nomli manifestni yuborgan bo‘lib, unda jamiyatga nisbatan nafratini ifoda etgan.
Hujum qilgan o‘smirning kiyimlari va jihozlarida ekstremistik mazmunli yozuvlar bo‘lgani aniqlangan. Jumladan, futbolkasida irqchilik mazmuni bo‘lgan shior, shlemida esa nafratni targ‘ib qiluvchi iqtiboslar bo‘lgan.
Tergov davomida gumonlanuvchining harakatlari ekstremizm va nafratga asoslanganligi aniqlanmoqda. Moskva viloyati gubernatori Andrey Vorobyov ushbu hodisani “dahshatli fojia” deb atab, bunday holatlarning oldini olish uchun zarur choralar ko‘rilishini ta’kidladi.
Shuningdek, u jurnalistlarga murojaat qilib, voqea tafsilotlari aks etgan materiallarni tarqatmaslikni so‘radi. Hozirda mazkur jinoyat bo‘yicha tergov ishlari davom etmoqda.
Jinoyatga olib kelgan sabablar, shuningdek, gumonlanuvchining ruhiy holati va boshqa omillar o‘rganilmoqda. Maktabda xavfsizlik choralarini kuchaytirish masalasi ham kun tartibida turibdi.
