Saudiya Arabistoniga safarlar 68 foizga oshdi
2025 yilning yanvar-oktyabr oylarida Saudiya Arabistoniga 237,1 ming nafar O‘zbekiston fuqarosi tashrif buyurdi. Bu haqda Zamin.uz xabar berdi.
Milliy statistika qo‘mitasi ma’lumotlariga ko‘ra, bu ko‘rsatkich o‘tgan yilga nisbatan 68 foizga o‘sdi. O‘zbekistonliklarning Saudiya Arabistoniga safar qilishdagi asosiy maqsadi ziyorat va turizm bo‘lib, ushbu yo‘nalishda 197,9 ming kishi tashrif buyurgan.
Shuningdek, 38,2 ming nafar fuqarolar qarindoshlarini ko‘rish uchun borgan. Bundan tashqari, 924 kishi davolanish, 66 kishi xizmat safarida bo‘lish va 31 kishi o‘qish maqsadida Saudiya Arabistoniga yo‘l olgan.
Saudiya Arabistoni hukumati qaroriga ko‘ra, kelgusi yildan boshlab haj ziyoratiga boruvchi fuqarolar uchun majburiy tibbiy ko‘rik joriy etiladi. Ushbu tibbiy ma’lumotnomasiz qirollikka kirish imkoni bo‘lmaydi.
Shuningdek, yurak, buyrak, o‘pka va jigar kabi og‘ir surunkali kasalliklarga chalingan, og‘ir ruhiy kasalliklar, demensiya va davolanayotgan onkologik kasalliklarga ega bo‘lgan ziyoratchilar hajga qo‘yilmasligi belgilangan.
