Hormuz orolida yomg‘ir qizil plyaj hosil qildi
Eronning Hormuz bo‘g‘ozida joylashgan Hormuz orolida noyob tabiiy hodisa kuzatildi. Bu haqda Zamin.uz xabar berdi.
16-dekabr kuni yog‘gan kuchli yomg‘ir natijasida orol sohili va sayoz dengiz suvlari qizil rangga kirib, ijtimoiy tarmoqlarda katta shov-shuvga sabab bo‘ldi. Mahalliy aholi "Qizil plyaj" deb ataydigan hududda yomg‘ir suvlari temirga boy mineral tuproqlarni yonbag‘irlardan dengizga olib tushgan.
Natijada qum va suv yorqin qirmizi tusga bo‘yalib, juda ham ajoyib manzara yuzaga kelgan. Ushbu holat aks etgan surat va videolar ijtimoiy tarmoqlarda keng tarqalib, minglab foydalanuvchilar e’tiborini tortdi.
Mutaxassislarning fikriga ko‘ra, bu hodisa orolning o‘ziga xos geologik tarkibi bilan bog‘liq. Hormuz oroli temir oksidiga boy bo‘lgan "golak" nomli qizil tuprog‘i bilan mashhur.
Kuchli yomg‘ir vaqtida ushbu minerallar suv bilan yuvilib, sohilda va dengizda tarqaladi. Garchi ayrim manbalarda bu hodisa "qonli yomg‘ir" deb atalgan bo‘lsa-da, bunda hech qanday xavfli yoki biologik omil mavjud emas.
"Kamalak oroli" deb ham ataladigan bu orol yil davomida o‘zining turli rangdagi tuproqlari, qiyali sohillari va tarixiy obidalari bilan sayyohlarni jalb etadi. Ayniqsa, qizil plyaj yomg‘irli kunlarda yanada sirli va jozibali ko‘rinishga ega bo‘ladi.
