O‘zbek mahsulotlari Kuvayt bozoriga yo‘l olmoqda
O‘zbekiston va Kuvaytning Uvaro kompaniyasi o‘rtasida o‘zbek mahsulotlarini Kuvayt bozorida targ‘ib qilish maqsadida muhim kelishuvga erishildi. Bu haqda Zamin.uz xabar berdi.
Ushbu kelishuvga ko‘ra, Kuvayt hududida o‘zbek mahsulotlariga ixtisoslashgan alohida savdo do‘koni ochilishi rejalashtirilmoqda. Bu haqda “Dunyo” axborot agentligi xabar berdi.
Mazkur tashabbus doirasida o‘tkazilgan Uzbek Food Festival tadbirida O‘zbekistondan 20 dan ortiq ishlab chiqaruvchi va eksportchi kompaniyalar ishtirok etdi. Festivalda ular quritilgan mevalar, sabzavotlar, qandolat mahsulotlari va milliy ziravorlarni namoyish etishdi.
O‘zbek mahsulotlarining tabiiyligi va yuqori sifati Kuvayt bozoridagi vakillarda katta qiziqish uyg‘otdi. Tadbir davomida Sultan Center gipermarketi orqali o‘zbek mahsulotlarini Kuvaytga yetkazib berish bo‘yicha dastlabki buyurtmalar qabul qilindi.
Shuningdek, Sultan Center va Majdi Food kompaniyalari bilan mahsulotlarni Kuvayt bozoriga tizimli ravishda olib chiqish, logistika masalalarini takomillashtirish va sotuv hajmini oshirish yuzasidan muzokaralar olib borildi. Ma’lum qilinishicha, O‘zbekistonning meva va sabzavot eksporti so‘nggi yillarda keskin o‘smoqda.
2025 yilning yanvar–oktyabr oylarida mamlakat 1,8 million tonna meva va sabzavotni 1,7 milliard dollarlik qiymatda eksport qilgan. Bu ko‘rsatkich o‘tgan yilga nisbatan qariyb 40 foizga oshgan.
Mutaxassislarning fikricha, Kuvaytda o‘zbek mahsulotlariga ixtisoslashgan do‘konning ochilishi O‘zbekiston brendini Yaqin Sharq bozorida yanada mustahkamlash, eksport geografiyasini kengaytirish va mahalliy ishlab chiqaruvchilar uchun yangi imkoniyatlar yaratishga xizmat qiladi.
