Hindistonning Bihar shtatida bosh vazir Nitish Kumar rasmiy tadbir davomida musulmon ayolning hijobiga aralashgani oqibatida jiddiy tanqidlar markazida qoldi. Bu haqda Zamin.uz xabar berdi.
Mahalliy manbalar xabariga ko‘ra, tibbiyot xodimlariga tayinlov hujjatlari topshirilayotgan marosimda shifokor Nusrat Parvin sahnaga chiqqanida, Kumar uning hijobiga ishora qilib, “Bu nima?” degan savolni bergan va hijobini pastga tortishga harakat qilgan. Ushbu holat tadbir ishtirokchilari va jamoatchilik e’tiborini tortdi.
Videotasvirlarda ayolning hayratga tushgani va vazirning yonidagi o‘rinbosar uni to‘xtatishga uringani aks etgan. Mazkur voqea inson huquqlari tashkilotlari tomonidan qattiq qoralandi.
Amnesti International rahbari Akar Patel bu harakatni “ayol qadr-qimmati va shaxsiy erkinligiga tajovuz” sifatida baholadi. U hech kimning ayolning e’tiqodi yoki kiyinish uslubiga aralashishga haqli emasligini ta’kidladi.
Hindiston muxolifati ham vazirni keskin tanqid ostiga oldi. Rashtriya Janata Dal partiyasi vakillari Nitish Kumarning ruhiy holatiga shubha bildirgan bo‘lsa, Kongress partiyasi uni iste’foga chaqirdi va mazkur voqeani “jirkanch va kechirib bo‘lmas” deb atadi.
Ma’lum bo‘lishicha, voqeadan so‘ng Nusrat Parvin davlat xizmatidan voz kechish masalasini ko‘rib chiqmoqda. Bu hodisa Hindistonda din va e’tiqod erkinligi borasidagi muammolarni yana bir bor kun tartibiga olib chiqdi.
