Ukraina Qurolli kuchlarining sobiq bosh qo‘mondoni va Buyuk Britaniyadagi amaldagi elchisi Valeriy Zalujniy Ukrainadagi vaziyat bo‘yicha tashvishli bayonot berdi. Bu haqda Zamin.uz xabar berdi.
Generalning ta’kidlashicha, urushdan keyingi davrda mamlakat ichida fuqarolar urushi boshlanishi xavfi mavjud. U bu xavfni iqtisodiy tanglik, ishsizlik va ijtimoiy muammolar bilan bog‘ladi.
Zalujniyning fikriga ko‘ra, urushdan keyin Ukraina og‘ir iqtisodiy inqirozga duch kelishi mumkin. Yuz minglab odamlar ishsiz va boshpanasiz qolishi ehtimoli bor.
Bu holat jamiyatda ijtimoiy portlashga olib kelishi mumkin. U bunday vaziyat ichki barqarorlikka jiddiy tahdid solishini aytdi.
Shuningdek, general urushdan keyin millionga yaqin harbiy xizmatchining uyiga qaytishini qayd etdi. Agar ularning jamiyatga moslashuvi muvaffaqiyatsiz kechsa, bu jinoyatchilikning o‘sishiga sabab bo‘lishi mumkin.
Zalujniy bu holatni 1980-yillarda Afg‘oniston urushidan keyingi vaziyat bilan solishtirdi. Unga ko‘ra, jangovar tajribaga ega shaxslar noto‘g‘ri yo‘llarga kirib ketishi ehtimoli bor.
Zalujniyning ta’kidlashicha, Ukrainada tezkor tinchlikka erishish muhim, ammo bu tinchlik mamlakatni saqlab qolish va rivojlantirish imkonini beradigan shartlarga asoslanishi kerak. U mag‘lubiyatni mamlakatning parchalanishi va to‘liq bosib olinishi deb ta’rifladi.
Generalning fikricha, hozirgi sharoitda taklif etilayotgan tinchlik shartlari Kiyev uchun qabul qilinarli emas. Uzoq muddatli tinchlik esa Ukraina uchun davlat sifatida tiklanishning yagona yo‘li bo‘lib qolmoqda.
