Rossiyada Gonkong grippi tez tarqalmoqda
Rossiyada gripp bilan kasallanish holatlari tez sur’atlarda ortib bormoqda. Bu haqda Zamin.uz xabar berdi.
Hozirgi vaqtda har 100 kishidan kamida biri ushbu kasallikka chalingani qayd etilgan. Ayrim mintaqalarda esa bemorlar soni bir hafta ichida ikki barobarga ko‘paygani kuzatilmoqda.
Mutaxassislar epidemiologik vaziyatni doimiy nazorat ostida ushlab, vaziyatning yanada og‘irlashishi ehtimolini istisno etmayapti. Tibbiyot mutaxassislarining ma’lumot berishicha, joriy mavsumda A (H3N2) shtammi, ya’ni Gonkong grippi asosiy qo‘zg‘atuvchi sifatida aniqlangan.
Ushbu virus yuqori yuqumliligi va jiddiy asoratlarga olib kelishi sababli alohida xavf tug‘diradi. Ayniqsa, homilador ayollar, yosh bolalar, keksa kishilar va surunkali kasalliklari bor insonlar uchun xavf yanada kattaroqdir.
Gonkong grippi o‘tkir virusli infeksiyalar qatoriga kiradi va asosan nafas olish organlarini zararlaydi. Kasallik yuqori harorat, mushaklar va bosh og‘rig‘i, kuchli zaharlanish holati kabi alomatlar bilan namoyon bo‘ladi.
Ba’zi holatlarda ko‘ngil aynishi va hazm tizimida buzilishlar ham kuzatilishi mumkin. Ma’lumot uchun, Gonkong grippi dastlab 1968 yilda Gonkongda aniqlangan.
Hozirgi kunda u mutatsiyaga uchragan holda mavsumiy gripp sifatida dunyo bo‘ylab tarqalishda davom etmoqda. Shu sababli, mutaxassislar xavfsizlik choralariga rioya qilish va grippga qarshi emlashni tavsiya etmoqda.
