Misrda bo‘lib turgan O‘zbekiston fuqarolariga O‘zbekistonning Qohiradagi elchixonasi tomonidan muhim ogohlantirish e’lon qilindi. Bu haqda Zamin.uz xabar berdi.
So‘nggi kunlarda mahalliy huquq-tartibot idoralari tomonidan vatandoshlarimizning ushlab turilishi bilan bog‘liq murojaatlar ko‘paygani sababli, elchixona rasmiy bayonot berdi. Bayonotda fuqarolardan mahalliy qonun-qoidalarga qat’iy rioya qilish so‘ralgan.
Ma’lum bo‘lishicha, Misrning Qohira va boshqa yirik shaharlarida migratsiya qonunchiligi va jamoat tartibiga rioya etilishi bo‘yicha tekshiruvlar kuchaytirilgan. Noqonuniy ravishda mamlakatda bo‘lib turgan, viza yoki yashash ruxsatnomasiga ega bo‘lmagan, shuningdek, jamoat tartibini buzgan xorijiy fuqarolarga nisbatan qat’iy choralar ko‘rilmoqda.
Ushbu choralar qatorida deportatsiya amaliyoti ham mavjud. Elchixona Misrning huquqni muhofaza qiluvchi idoralari bilan muzokaralar olib borayotganini bildirgan.
Shu bilan birga, o‘zbekistonliklarga ehtiyotkor bo‘lish va qonunlarga mas’uliyat bilan yondashish tavsiya etilgan. Xususan, fuqarolarga shaxsni tasdiqlovchi hujjat — pasportni doimo yonida olib yurish, viza yoki yashash ruxsatnomasini rasmiylashtirish, ruxsatsiz mehnat faoliyati bilan shug‘ullanmaslik hamda hujjatlarning amal qilish muddatini o‘z vaqtida uzaytirish qat’iy tavsiya qilinmoqda.
Elchixonaning ta’kidlashicha, ushbu qoidalarga rioya qilish orqali jarimalar, deportatsiya va boshqa noxush holatlar oldini olish mumkin. Fuqarolar qonun-qoidalarga amal qilishda mas’uliyatli bo‘lishlari lozim.
