Muzlatgich ko‘targan erkak xotirasiga hurmat ko‘rsatdi

Britaniyalik Mett Jons xotini xotirasiga bag‘ishlab noodatiy tadbir o‘tkazdi. Bu haqda Zamin.uz xabar berdi.

U 37 kilogrammli muzlatgichni yelkasiga ko‘tarib, 112 kilometr yo‘l bosdi. Ushbu qadamni u rafiqasining so‘zlari va xotirasiga hurmat sifatida amalga oshirdi.

Ma’lum bo‘lishicha, 2018 yilda Mett Jons chanoq-son bo‘g‘imini almashtirish operatsiyasini boshdan kechirgan. Shifokor unga jismoniy zo‘riqishdan tiyilishni tavsiya qilgan.

Xotini esa hazil tariqasida: "Bu ahmoq orqasida muzlatgich bilan uzoq masofaga yuradi", degan edi. Mett bu so‘zlarni chaqiriq sifatida qabul qilgan va buni amalga oshirishga qaror qilgan.

Afsuski, uning rafiqasi 43 yoshida yurak xastaligidan vafot etgan. Mett to‘rt farzandni yolg‘iz o‘zi tarbiyalashga majbur bo‘lgan, biroq turmush o‘rtog‘ining o‘sha hazil so‘zlarini hech qachon unutmagan.

U sevgilisining xotirasini hurmat qilish va uning qo‘llab-quvvatlagan xayriya tashkilotiga yordam berish maqsadida ushbu chellenjni amalga oshirdi. Tadbir davomida 50 ming funt sterling miqdorida mablag‘ yig‘ildi.