Fransiyada 12 bemorni o‘ldirgan shifokorga umrbod qamoq
Fransiyaning Bezanson shahri sudi jamiyatni larzaga solgan jinoyat ishi bo‘yicha yakuniy hukmni e’lon qildi. Bu haqda Zamin.uz xabar berdi.
12 nafar bemorning o‘limi va yana 30 kishining zaharlanishida aybdor deb topilgan sobiq anesteziolog Frederik Peshe umrbod qamoq jazosiga hukm qilindi. Bu haqda France 24 axborot manbasi xabar berdi.
Sud materiallariga ko‘ra, 53 yoshli Frederik Peshe 2008 yildan 2017 yilgacha bo‘lgan davrda bemorlarga qasddan zaharli moddalar qo‘shgan. U tomchilar tarkibiga yurak to‘xtashiga yoki kuchli qon ketishiga olib keluvchi moddalarni aralashtirgan.
Natijada 12 kishi hayotdan ko‘z yumgan, yana o‘nlab bemorlar og‘ir ahvolga tushgan. Peshening eng yosh qurboni atigi to‘rt yoshda bo‘lgan.
2016 yilda oddiy operatsiya paytida bola ikki marta yurak to‘xtashiga duch kelgan. Eng keksa qurbon esa 89 yoshli bemor bo‘lgan.
Ushbu ish ortidan Fransiya matbuoti Pesheni «Doktor o‘lim» deb atay boshlagan. Prokuratura ma’lumotlariga ko‘ra, Peshe ayrim hamkasblari bilan kelishmovchilikka borib, ularga zarar yetkazish maqsadida ularning bemorlariga qasd qilgan.
Ba’zi hollarda u zaharlangan bemorlarni reanimatsiya qilishga urinib, o‘zini qutqaruvchi sifatida ko‘rsatishga harakat qilgan. Biroq Frederik Peshe tergov davomida barcha ayblovlarni rad etdi.
U zaharlanish holatlarini boshqa shifokorlarning xatolari bilan bog‘ladi va o‘zi ishlagan klinikalardan birida boshqa bir shaxs zahar qo‘llaganini iddao qildi. Sud qaroriga ko‘ra, Peshe umrbod qamoq jazosiga hukm qilinib, tibbiyot sohasida ishlash huquqidan abadiy mahrum qilindi.
Shuningdek, u hukm ustidan shikoyat qilish niyatida ekanini ma’lum qildi. Mazkur ish Fransiya jamiyatida tibbiyotga bo‘lgan ishonch, shifokorlarning mas’uliyati va nazorat tizimlari haqida qizg‘in bahs-munozaralarni kuchaytirdi.
