AQSh Tayvanga 11,1 milliard dollarlik qurol yetkazadi
AQSh hukumati Tayvanga 11,1 milliard dollarlik qurol yetkazib berishni tasdiqladi. Bu haqda Zamin.uz xabar berdi.
Bu qaror orol davlatiga ko‘rsatilgan eng katta harbiy yordam paketi sifatida qayd etilmoqda. Mazkur shartnoma AQShning sobiq prezidenti Donald Tramp davridagi ikkinchi yirik harbiy kelishuv hisoblanadi.
Ushbu bitim Xitoyning Tayvanga nisbatan siyosiy va harbiy bosimi kuchaygan bir vaqtda qabul qilindi. Xitoy Tayvanni o‘z hududi deb hisoblaydi va bu qarorga keskin qarshilik bildirdi.
Yordam paketiga HIMARS raketa tizimlari, gaubitsalar, Javelin tankka qarshi majmualar, Altius kamikadze-dronlari va boshqa harbiy texnikalar uchun ehtiyot qismlar kiradi. Tayvan Mudofaa vazirligi mazkur qurollar mamlakat mudofaa salohiyatini oshirishi va mintaqaviy barqarorlikni ta’minlashga xizmat qilishini ma’lum qildi.
Ayni paytda bitim AQSh Kongressiga taqdim etilgan. Nazariy jihatdan kongressmenlar ushbu kelishuvni bekor qilish yoki o‘zgartirish huquqiga ega, biroq Kongressda Tayvanni qo‘llab-quvvatlash keng miqyosda mavjud.
Tayvan prezidenti Lay Sin-de yaqin yillarda qo‘shimcha 40 milliard dollarlik mudofaa byudjeti ajratilishini e’lon qilgan. U milliy xavfsizlik masalasida murosa bo‘lmasligini ta’kidlagan.
Xitoy esa AQShning bu qadamini keskin tanqid qilib, bunday qurollar yetkazib berish Tayvan bo‘g‘ozida tinchlik va barqarorlikni buzishini qayd etdi. Xitoy, shuningdek, AQShni Tayvan bilan harbiy hamkorlikni zudlik bilan to‘xtatishga chaqirdi.
