Tojikiston Rossiyada halok bo‘lgan bolaga norozilik bildirdi
Tojikiston Respublikasi Tashqi ishlar vazirligi Rossiya Federatsiyasida sodir bo‘lgan fojiali voqea yuzasidan rasmiy bayonot berdi. Bu haqda Zamin.uz xabar berdi.
Unga ko‘ra, 2025 yilning 16 dekabr kuni Moskva viloyatining Odintsovo shahar okrugiga qarashli Gorki-2 qishlog‘ida 10 yoshli Tojikiston fuqarosi Qobiljon Aliyev etnik nafrat asosida qilingan hujum qurboniga aylangan. Bola Uspenskaya umumta’lim maktabining 4-sinfida o‘qigan bo‘lib, hujum oqibatida voqea joyida vafot etgan.
Mazkur hodisa Tojikiston tomonidan keskin qoralandi. Shu munosabat bilan Rossiyaning Tojikistondagi Favqulodda va Muxtor Elchisi Semyon Grigorev Tojikiston Tashqi ishlar vazirligiga chaqirilib, unga rasmiy norozilik notasi topshirildi.
Notada jinoyatni zudlik bilan va xolis o‘rganish, aybdorlarni qonunchilikka muvofiq javobgarlikka tortish qat’iy talab qilingan. Shuningdek, Tojikistonning Rossiyadagi elchixonasi mazkur jinoyat ishi bo‘yicha tergov jarayonlarini doimiy nazoratga olganini ma’lum qildi.
Rossiya Tashqi ishlar vazirligiga ham rasmiy murojaat yo‘llangan. Tojikiston TIV marhum bolaning oilasi va yaqinlariga chuqur hamdardlik bildirib, xorijda yashayotgan fuqarolarining huquqlari va xavfsizligini ta’minlash davlat siyosatida ustuvor vazifa ekanini qayd etdi.
Vazirlik Rossiya Federatsiyasining vakolatli organlari mazkur voqeani to‘liq, shaffof va adolatli o‘rganishiga umid bildirdi.
