Maktabdagi hujum: 4-sinf o‘quvchisi halok bo‘ldi

Rossiyaning Moskva viloyatidagi Odinsovo shahri yaqinida joylashgan Gorki-2 aholi punktida yuz bergan fojeali voqea jamoatchilikni larzaga soldi. Bu haqda Zamin.uz xabar berdi.

Maktabda pichoqli hujum uyushtirgan 15 yoshli o‘smir rasmiy tarzda hibsga olindi. Ma’lum bo‘lishicha, 18 dekabr kuni Moskva shahridagi Tver tuman sudi Tergov qo‘mitasining iltimosiga binoan, qotillik va qotillikka urinishda ayblanayotgan ushbu o‘smirni ikki oy muddatga qamoqqa olishga qaror qilgan.

Tergov ma’lumotlariga ko‘ra, 16 dekabr kuni ertalab to‘qqizinchi sinf o‘quvchisi maktab hududiga pichoq bilan kirib kelgan. U dastlab sinf xonalari bo‘ylab yurib, hujum qilish uchun qulay vaziyat qidirgan.

Uni payqagan maktab qo‘riqchisiga qarshi ko‘zni achishtiruvchi gaz ishlatib, keyin uni pichoqlagan. Shundan so‘ng o‘smir maktabning 4-sinf o‘quvchisi, tojikistonlik migrant oila farzandi Qobiljon Aliyevga hujum qilgan.

Afsuski, bola olgan og‘ir jarohatlar oqibatida halok bo‘lgan. Tergov qo‘mitasi o‘smirga nisbatan qotillik va ikki yoki undan ortiq shaxsni o‘ldirishga urinish moddalari bo‘yicha jinoyat ishi qo‘zg‘atilganini ma’lum qildi.

So‘roq davomida gumonlanuvchi aybini to‘liq tan olib, hujumga oldindan reja tuzgani haqida ham ma’lumot bergan. Tergov davomida o‘smirning telefonida halok bo‘lgan o‘quvchining surati, selfilar hamda ekstremistik mazmundagi tasvirlar topilgan.

Bu holat tergovchilarning alohida e’tiborini tortgan. Fojeadan so‘ng Tojikiston va Rossiya Tashqi ishlar vazirliklari rasmiy bayonot berib, halok bo‘lgan bolaning oilasiga chuqur hamdardlik bildirdi.

Qobiljon Aliyevning jasadi 18 dekabr kuni vataniga olib kelinib, Shahrinav tumanida tuproqqa qo‘yildi. Mazkur voqea bir oilaning hayotini butunlay o‘zgartirib yubordi.

Bu kabi holatlar jamiyat uchun jiddiy ogohlantirish va zo‘ravonlikka qarshi kurashish zarurligini yana bir bor eslatib turibdi.