Germaniya 535 afg‘on qochqinni qabul qilishga tayyor
Germaniya hukumati Pokiston hududida murakkab vaziyatda qolgan 535 nafar Afg‘oniston fuqarosini qabul qilishga tayyor ekanini e’lon qildi. Bu haqda Zamin.uz xabar berdi.
Ushbu ma’lumotni Germaniya ichki ishlar vaziri Aleksandr Dobrindt tasdiqlagan. Ma’lum bo‘lishicha, bu fuqarolar 2021 yil avgust oyida “Tolibon” harakati hokimiyatni qo‘lga kiritganidan so‘ng xavfsizlik sababli o‘z vatanini tark etishga majbur bo‘lgan.
Hozirda ular Pokistonda vaqtincha yashamoqda, lekin huquqiy maqomi hanuz aniq emas. Qabul qilinishi rejalashtirilgan shaxslar orasida Germaniya Bundesveri va boshqa xalqaro tashkilotlar bilan hamkorlik qilgan afg‘onlar, inson huquqlarini himoya qilgan faollar hamda xotin-qizlar huquqlari uchun faoliyat olib borgan jamoat arboblari bor.
Aleksandr Dobrindtning so‘zlariga ko‘ra, Germaniya bu fuqarolarni imkon qadar tez qabul qilishni maqsad qilgan. Ushbu qaror insonparvarlik tamoyillari asosida qabul qilingan.
Pokiston esa Germaniyaga bu afg‘onlarni dekabr oyi oxiriga qadar qabul qilish majburiyatini qo‘ygan. Aks holda, ularni Afg‘onistonga deportatsiya qilish masalasi ko‘rib chiqilishi mumkinligi haqida ogohlantirish bergan.
