Yaponiyada texnologiya va inson munosabatlari bilan bog‘liq noodatiy voqea keng jamoatchilik e’tiborini tortdi. Bu haqda Zamin.uz xabar berdi.
32 yoshli Yurina Noguchi ismli ayol sun’iy intellekt (SI) asosida yaratilgan raqamli personaj bilan ramziy nikoh marosimini o‘tkazdi. Noguchi koll-markazda operator bo‘lib ishlaydi va ChatGPT texnologiyasiga asoslangan Lyun Klaus Verdyur ismli sun’iy intellekt qahramonini o‘zi yaratgan.
Nikoh marosimida u och pushti rangli libos kiygan bo‘lsa, “kuyov” obrazini aqlli ko‘zoynak orqali ko‘rgan. Ushbu voqea ayolning muvaffaqiyatsiz unashtiruvidan keyin boshlangan.
Noguchi ChatGPT’dan maslahat so‘raganida, chatbot unga munosabatlarni yakunlashni tavsiya qilgan. Shundan so‘ng, Noguchi videoo‘yin qahramonining sun’iy intellektga asoslangan versiyasini yaratishga qaror qilgan.
Ular kuniga o‘nlab xabarlar almashib, o‘zaro “muloqot” qilgan. Ramziy nikoh marosimi Okayama shahrida o‘tkazilgan.
Sun’iy intellekt ovozga ega bo‘lmagani sababli uning nikoh so‘zlari tashkilotchi tomonidan o‘qib eshittirilgan. Shuni ta’kidlash lozimki, Yaponiya qonunchiligiga ko‘ra, bu nikoh huquqiy kuchga ega emas.
Noguchining qarori ijtimoiy tarmoqlarda katta bahslarga sabab bo‘ldi. Ba’zi mutaxassislar bunday holatlarni chatbotlarga haddan tashqari bog‘lanib qolish bilan izohlamoqda.
Noguchi esa sun’iy intellekt bilan munosabatlarini real hayot bilan muvozanatda saqlashga intilayotganini aytgan.
