Putin: Aholi sonini oshirish dolzarb vazifa
2023-yil 19-dekabr kuni Moskvada Rossiya prezidenti Vladimir Putin ishtirokida yil yakunlariga bag‘ishlangan matbuot anjumani o‘tkazildi. Bu haqda Zamin.uz xabar berdi.
Anjuman davomida prezident qariyb 4,5 soat mobaynida fuqarolar va ommaviy axborot vositalari vakillarining savollariga javob berdi. U jamiyatni tashvishga solayotgan muhim masalalar, jumladan, demografiya va oilaviy qadriyatlar mavzusiga alohida e’tibor qaratdi.
Vladimir Putinning ta’kidlashicha, aholi sonining kamayishi bugungi kunda deyarli barcha rivojlangan davlatlar uchun dolzarb muammo bo‘lib qolmoqda. U Yaponiyada tug‘ilish koeffitsiyenti 0,8, Janubiy Koreyada esa 0,7 darajasida ekanini qayd etdi.
Rossiyada bu ko‘rsatkich hozirda 1,4 atrofida. Prezidentning fikricha, mamlakatda aholi sonini oshirish uchun kamida 2 koeffitsiyentga erishish zarur, ammo bu oson vazifa emasligini ta’kidladi.
Davlat rahbari bu muammoning sabablariga ham to‘xtalib o‘tdi. Unga ko‘ra, zamonaviy jamiyatda ko‘plab ayollar avval ta’lim olish, malaka oshirish va karyera qilishni maqsad qilib qo‘yishadi.
Shu sababli birinchi farzand ko‘pincha 30 yoshdan keyin tug‘iladi. Bu yoshda esa onalar jismoniy va ruhiy jihatdan charchagan bo‘lishi mumkin.
Putin jamiyatda farzandli bo‘lish, onalik va otalik qadriyatlarini targ‘ib qilish, ularni qadrli va “moda”ga aylantirish zarurligini ta’kidladi. Prezident an’anaviy qadriyatlar, jumladan, erta nikoh masalasiga ham to‘xtaldi.
U Kavkaz xalqlarining farzandlarni yoshroq paytida oila qurishga undash odatini ijobiy baholadi va bu borada Ramzan Qodirov oilasini misol sifatida keltirdi. Shu bilan birga, yosh oilalarning duch kelayotgan qiyinchiliklarini tan olgan holda, Putin oila qurish va farzand ko‘rishni ortiqcha kechiktirmaslikni tavsiya qildi.
Uning fikricha, bu qadamlar jamiyatning barqaror kelajagi va demografik muvozanatni ta’minlashda hal qiluvchi ahamiyatga ega.
