Rossiya Federal xavfsizlik xizmati (FXX) Rostov viloyatidagi jazoni ijro etish koloniyalaridan birida rejalashtirilgan terrorchilik harakatining oldi olinganini ma’lum qildi. Bu haqda Zamin.uz xabar berdi.
Bu haqda RIA Novosti agentligi xabar berdi. FXX ma’lumotiga ko‘ra, ushbu ishda gumon qilinayotgan shaxslar uch nafar O‘zbekiston fuqarosidir.
Ular og‘ir jinoyatlar uchun qamoq jazosini o‘tayotgan bo‘lib, Rossiya tomonining iddaosiga ko‘ra, taqiqlangan ISHID (ISIS) terrorchilik tashkiloti tarafdorlari hisoblanadi. Xavfsizlik xizmati bayonotida qayd etilishicha, gumondorlar qamoqxona xodimlarini garovga olish va koloniyadagi binolarga o‘t qo‘yishni rejalashtirgan.
Ular bu maqsadda batafsil harakat rejasi ishlab chiqqan, ammo rejani amalga oshirishga ulgurmagan. Tintuv chog‘ida gumondorlarning yonidan terrorchilikka aloqador ramzlar tushirilgan pichoqlar va boshqa buyumlar topilgani aytilmoqda.
Rossiya xavfsizlik xizmatlari bu buyumlarni rejalashtirilgan hujum bilan bog‘lamoqda. Hozircha O‘zbekiston tomoni mazkur holat bo‘yicha rasmiy munosabat bildirmagan.
Tergov ishlari davom etmoqda va gumondorlarning aybi sud jarayonida aniqlanishi kutilmoqda.
