Kamboja-Tailand chegarasidagi mojaro 500 ming odamni ko‘chirdi

Kamboja-Tailand chegarasidagi mojaro tufayli 500 mingga yaqin odam o‘z uylarini tark etishga majbur bo‘ldi. Bu haqda Zamin.uz xabar berdi.

Kamboja matbuot agentligining xabar berishicha, evakuatsiya qilinganlarning aksariyati ayollar va bolalardan iborat. Mojaro natijasida 14 viloyatda jami 498,2 ming kishi xavfsiz hududlarga ko‘chirilgan.

To‘qnashuvlar davomida 18 nafar tinch aholi halok bo‘lgan, 78 kishi jarohat olgan. Dekabr oyida sodir bo‘lgan mojaro tufayli 73 ta turar-joy binosi, bir nechta diniy inshootlar va shahar infratuzilmasiga zarar yetgan.

7-dekabr kuni boshlangan bu qarama-qarshilikda Kamboja va Tailand qo‘shinlari bir-birlarining chegara hududlarini nishonga olgan. Kamboja Mudofaa vazirligi Tailand harbiylarini chegara hududlarida tahdidli harakatlar sodir etganlikda ayblagan.

Tailand rasmiylari esa bunga javoban Kamboja pozitsiyalariga hujum amalga oshirganini bildirgan. 12-dekabr kuni ikki davlat yetakchilari otishmalarni to‘xtatish haqida kelishuvga erishgan bo‘lsa-da, keyingi kunda Tailand rasmiylari mojaro davom etishi mumkinligini ma’lum qilgan.

Hozirda mintaqadagi vaziyat keskinligicha qolmoqda.