Shvetsiyada o‘smir qizlar granata hujumi uyushtirdi

Shvetsiyada uch nafar o‘smir qizlar tomonidan ikki marta granata hujumi sodir etilgani ma’lum bo‘ldi. Bu haqda Zamin.uz xabar berdi.

Bu haqda “Watchers” nashri xabar berdi. Hujumlarda 14, 16 va 17 yoshli qizlar ishtirok etgan bo‘lib, ular bu harakatlarni “Super Mario” taxallusi bilan tanilgan shaxsning ko‘rsatmalariga asosan amalga oshirgan.

Birinchi hodisa 2025 yil 5 sentyabr kuni Myolndal shaharchasida ro‘y bergan. Ko‘p qavatli uy kirishiga granata tashlangan, ammo portlash sodir bo‘lmagan.

Shunga qaramay, xavfsizlik nuqtai nazaridan bino aholisi evakuatsiya qilingan. Ikkinchi hodisa esa 6 oktyabr kuni Nyodinge shahrida bo‘lib, bu safar ikki granata tashlangan.

Ulardan biri portlagan, ikkinchisi esa binoga yaqin joydan topilgan. Tergov ma’lumotlariga ko‘ra, qizlar hujumni videoga olib, jonli efirda “Super Mario”ga uzatishgan.

Ushbu shaxs ularga SMS orqali ko‘rsatmalar berib, ruhlantirib turgan. Uchala qiz bu harakatlari uchun jami 45 ming shved kronasi olgani aniqlangan.

14 yoshli qiz ushbu hujumlarni to‘dalar o‘rtasidagi “qasos” sifatida amalga oshirganini tan olgan. Qizlar qilgan ishlaridan pushaymon ekanini bildirgan.

16 va 17 yoshli o‘smirlar jamoat xavfsizligiga tahdid solish ayblovi bilan sudga tortilgan. 14 yoshli qiz esa yoshi kichikligi sababli faqat tergov ostida qolmoqda.