Missisipi ustidagi 94 yillik ko‘prik buzib tashlandi
AQShning Missisipi daryosi ustida joylashgan va 94 yil davomida xizmat qilgan Blek Hok ko‘prigi ataylab portlatilib buzildi. Bu haqda Zamin.uz xabar berdi.
Ushbu ko‘prik 1931-yilda qurilgan bo‘lib, Ayova shtatidagi Lansing shahrini Viskonsin shtati bilan bog‘lab turgan. Ko‘prik o‘zining markaziy yoysimon arka qismi va ikkita baland metall tayanchli minorasi bilan ajralib turgan.
Biroq ko‘prikning torligi sababli unda tez-tez yo‘l-transport hodisalari yuz bergan. Bundan tashqari, daryo tubining relyefi va ko‘prik tayanchlarining joylashuvi tufayli ba’zan yuk kemalari ham ko‘prikka urilib ketgan.
Ushbu muammolar inshootning foydalanish muddatini cheklagan va uni yangilash zaruratini keltirib chiqargan. 2023-yilda eski ko‘prik o‘rniga yangi ko‘prik qurilishi boshlangan.
Qurilish ishlari 2027-yil bahorida yakunlanishi rejalashtirilgan. Qurilish jarayonida xavfsizlikni ta’minlash uchun Blek Hok ko‘prigi ikki marta transport harakati uchun yopilgan.
Yangi ko‘prik foydalanishga topshirilgunga qadar aholini daryodan o‘tkazish maqsadida vaqtinchalik suv orqali o‘tish xizmati tashkil etiladi. Bu chora-tadbirlar hudud aholisi uchun qulaylik yaratishga va transport xavfsizligini ta’minlashga qaratilgan.
