Avstraliyada qurolli hujum qurbonlari xotirlandi

Avstraliyada Sidneyning Bondi-Bich hududida sodir bo‘lgan qurolli hujum qurbonlarini xotirlash tadbirlari o‘tkazildi. Bu haqda Zamin.uz xabar berdi.

Bir hafta avval yahudiylarning Hanukka bayrami davomida ro‘y bergan ushbu hujum oqibatida 15 kishi halok bo‘lgan va o‘nlab odamlar jarohat olgan edi. Shu sababli mamlakatda xotira kuni e’lon qilindi.

Yakshanba kuni hukumat binolarida bayroqlar yarim tushirildi, hujum boshlangan vaqtda esa bir daqiqalik sukut saqlandi. Aholiga qurbonlarni xotirlash maqsadida sham yoqish tavsiya etildi.

Bondi-Bichda o‘tkazilgan xotira marosimi kuchaytirilgan politsiya nazorati ostida amalga oshirildi. Bosh vazir Entoni Albanese mamlakatdagi huquq-tartibot va razvedka organlari faoliyatini qayta ko‘rib chiqish bo‘yicha ko‘rsatma berdi.

Unga ko‘ra, xavfsizlikni ta’minlash uchun davlat tuzilmalari to‘liq tayyor bo‘lishi lozim. Ushbu tekshiruv natijalari kelgusi oylarda e’lon qilinishi kutilmoqda.

Rasmiylar ushbu hujumni yahudiylarga qarshi terrorchilik harakati sifatida tergov qilmoqda. Hodisadan so‘ng mamlakat bo‘ylab xavfsizlik choralari kuchaytirildi, nafratga asoslangan jinoyatlarga qarshi kurash esa qat’iylashtirildi.

Hukumat Avstraliyada zo‘ravonlik va ekstremizmga o‘rin yo‘qligini yana bir bor ta’kidladi.