Afg‘onistonda 17 million kishi ochlikdan aziyat chekmoqda

Birlashgan Millatlar Tashkiloti (BMT)ning Jahon oziq-ovqat dasturi Afg‘onistonda oziq-ovqat tanqisligi yildan-yilga keskinlashib borayotganini ma’lum qildi. Bu haqda Zamin.uz xabar berdi.

Tashkilotning xabar berishicha, mamlakatda millionlab insonlarga yordam ko‘rsatish imkoniyatlari cheklangan bo‘lib, vaziyat tobora og‘irlashmoqda. Afg‘onistonda Tolibon harakati hokimiyatni qayta qo‘lga olganidan so‘ng xalqaro moliyaviy va gumanitar yordam hajmi sezilarli darajada kamaydi.

Bundan tashqari, tabiiy ofatlar, jumladan, zilzilalar mavjud inqirozni yanada chuqurlashtirgan. BMT ma’lumotlariga ko‘ra, eng zaif qatlamga mansub 6 million afg‘onistonlikni oziq-ovqat bilan ta’minlash uchun kamida 460 million dollar mablag‘ zarur.

Hozirgi kunda esa mamlakatda 17 million kishi ochlikdan aziyat chekmoqda. Bu ko‘rsatkich o‘tgan yilga nisbatan qariyb 3 million nafarga oshganini qayd etishmoqda.

Ayniqsa, bolalar orasidagi ahvol og‘irligicha qolmoqda. Rasmiy ma’lumotlarga ko‘ra, 3,7 million bola to‘yib ovqatlanmayapti, ulardan 1 millioni og‘ir ochlik holatida yashamoqda.

Mutaxassislar zarur yordam ko‘rsatilmasa, bu holat bolalarda uzoq muddatli sog‘liq muammolari va o‘lim xavfini kuchaytirishi mumkinligini ta’kidlamoqda. Bu muammo xalqaro hamjamiyatning qo‘shma sa’y-harakatlarini talab qiladi.

Mamlakatdagi oziq-ovqat taqchilligini bartaraf etish uchun tezkor va samarali chora-tadbirlar zarur.