Niderlandiyada yo‘l qoidalari buzilishi uchun jarimalar oshadi
2026 yil 1 yanvardan boshlab Niderlandiyada yo‘l harakati qoidalarini buzganlik uchun jarimalar miqdori o‘rtacha 4 foizga oshiriladi. Bu haqda Zamin.uz xabar berdi.
Ushbu o‘zgarishlar haydovchilar uchun qator yangi talablarni o‘z ichiga oladi. Xususan, rulda telefon ishlatish tartibi qat’iy nazorat qilinadi.
Maxsus hands-free qurilmasiz telefon ishlatgan haydovchilarga 440 yevro jarima solinadi. Shuningdek, harakat tezligini belgilangan me’yordan oshirish ham sezilarli moliyaviy jazolarni keltirib chiqaradi.
Shaharda tezlikni 5 km/soatga oshirgan haydovchilar 46 yevro jarima to‘laydi, avtobanda esa tezlikni 20 km/soatga oshirish 229 yevroga tushadi. Qizil chiroqda o‘tish holati esa kamida 320 yevro jarima bilan jazolanadi.
To‘xtash qoidalarini buzish ham qimmatga tushadi. Noto‘g‘ri to‘xtash uchun jarima miqdori 130 yevrodan boshlanib, nogironlar uchun ajratilgan joyda noqonuniy to‘xtash 400 yevroni tashkil qiladi.
Tajovuzkor haydash alohida e’tiborda bo‘lib, o‘ngdan quvib o‘tish 320 yevro, avtomobillar orasidagi masofani me’yoridan qisqa saqlash esa 380 yevro jarima bilan jazolanadi. Eng muhim jihat shundaki, Niderlandiyada belgilangan jarimalardan qochib qutulishning imkoni yo‘q.
Ushbu jarimalar chet elda ham undiriladi. Agar jarima o‘z vaqtida to‘lanmasa, uning miqdori tezda oshib boradi.
Shu sababli rasmiylar haydovchilardan yo‘l harakati qoidalariga qat’iy rioya qilishni talab qilmoqda.
