Janubiy Afrikaning Yoxannesburg shahridan janubi-g‘arbda joylashgan Bekkersdal hududida qurolli hujum sodir bo‘ldi. Bu haqda Zamin.uz xabar berdi.
Ushbu hodisa natijasida 9 kishi halok bo‘lgan, yana 10 nafari jarohat olgan. Bu haqda Janubiy Afrika Politsiya xizmati rasmiy ma’lumot berdi.
Voqea 21-dekabrga o‘tar kechasi, mahalliy vaqt bilan soat taxminan 01:00 da yuz bergan. Politsiya bergan ma’lumotga ko‘ra, noma’lum shaxslar litsenziyaga ega hududga bostirib kirib, u yerda bo‘lgan odamlarga qarata o‘q uzgan.
Hujumchilar oq rangli mikroavtobus va kumushrang yengil avtomashinada kelgan. Ular qochib ketayotganida ham atrofga tartibsiz ravishda o‘q uzishda davom etgan.
Jarohatlanganlar tez yordam xodimlari tomonidan shifoxonaga yetkazilgan va ularga zarur tibbiy yordam ko‘rsatilmoqda. Huquqni muhofaza qiluvchi organlar jinoyatchilarni aniqlash va qo‘lga olish maqsadida qidiruv ishlarini boshlagan.
Hozircha ushbu hujumning aniq sabablari noma’lum bo‘lib qolmoqda. Bekkersdal hududi ishsizlik va ijtimoiy muammolar yuqori bo‘lgan mintaqalardan biri hisoblanadi.
Janubiy Afrika dunyo bo‘yicha jinoyatchilik darajasi yuqori bo‘lgan mamlakatlar qatoriga kiradi. Rasmiylar aholiga hushyorlikni oshirishni va tergov jarayoniga yordam berishni so‘ragan.
