Yaponiya Fukusimada sodir bo‘lgan yadro fojiasidan so‘ng 15 yil o‘tib, eng yirik yadro elektr stansiyasi – Kashivazaki-Kariwa reaktorini qayta ishga tushirishga ruxsat berdi. Bu haqda Zamin.uz xabar berdi.
Ushbu stansiya Tokiodan 220 kilometr shimoli-g‘arbda joylashgan bo‘lib, 2011-yilda yuz bergan zilzila va sunami oqibatida faoliyatini to‘xtatgan edi. Niigata viloyatining rahbariyati stansiyani qayta ishga tushirish bo‘yicha qarorini e’lon qildi.
Shu kuni viloyatda taxminan 300 kishi “Yadroga yo‘q” va “Fukusimani qo‘llab-quvvatlaymiz” kabi shiorlar bilan norozilik namoyishi o‘tkazdi. Ko‘pchilik aholining xavotiri stansiyaning xavfsizlik masalalari bilan bog‘liq bo‘lib, ular bunday qarorni qo‘llab-quvvatlamayapti.
TEPCO kompaniyasi birinchi reaktorni 2026-yilning 20-yanvar kuni ishga tushirishni rejalashtirgan. Shu bilan birga, mahalliy aholi e’tirozlarini kamaytirish va ularning qo‘llab-quvvatlashini ta’minlash maqsadida keyingi 10 yil davomida 100 milliard yen (taxminan 641 million dollar) sarmoya kiritishni va’da qilgan.
Shunga qaramay, ko‘plab fuqarolar bu rejaga ishonchsizlik bildirmoqda. Yaponiya hukumati energiya xavfsizligini kuchaytirish va import qilinadigan yoqilg‘i xarajatlarini qisqartirish maqsadida, yadroviy energiya ulushini 2040-yilgacha 20 foizga oshirishni rejalashtirmoqda.
Mutaxassislarning fikricha, Kashivazaki-Kariwa stansiyasining qayta ishga tushirilishi mamlakatning energiya strategiyasida muhim rol o‘ynaydi.
