Rossiya Grabovskoyedagi 50 fuqaroni majburan deportatsiya qildi
Ukrainaning Sumi viloyatidagi Grabovskoye qishlog‘ida yashovchi 50 nafar tinch aholi Rossiya harbiylari tomonidan majburan mamlakat hududidan olib chiqib ketildi. Bu haqda Zamin.uz xabar berdi.
Bu haqda Ukraina Tashqi ishlar vaziri Andrey Sibixa va Ombudsman Dmitriy Lubines rasmiy bayonot berdi. Voqealar 18-dekabr kuni boshlangan.
Rossiya qurolli kuchlari Belgorod viloyati bilan chegaradosh bo‘lgan Grabovskoye qishlog‘ida qolgan fuqarolarni nazoratga olib, ularni aloqa vositalaridan mahrum qilgan va noinsoniy sharoitlarda ushlab turgan. 20-dekabr kuni esa 50 nafar fuqaro Rossiya hududiga majburan deportatsiya qilingan.
Garovga olinganlar orasida ko‘pchilikni keksa ayollar va erkaklar tashkil qilgan. Ukraina ushbu holatni xalqaro huquq va Jeneva konvensiyasi me’yorlariga zid harbiy jinoyat sifatida baholamoqda.
Tashqi ishlar vaziri Andrey Sibixa xalqaro tashkilotlarni ushbu holatga e’tibor qaratishga va Ukrainadan noqonuniy olib ketilgan fuqarolarni qaytarishga chaqirdi. U, shuningdek, minglab boshqa ukrainlar, jumladan, bolalarni ham zudlik bilan o‘z uylariga qaytarish talabini qo‘llab-quvvatlashga undadi.
Ombudsman Dmitriy Lubines esa Rossiyadagi inson huquqlari bo‘yicha tashkilotlarga va Xalqaro Qizil Xoch Qo‘mitasiga rasmiy so‘rov yuborib, deportatsiya qilingan fuqarolarning qayerda saqlanayotgani va ularning salomatligi haqida ma’lumot talab qilmoqda. Grabovskoye qishlog‘ida urushdan oldin 700 ga yaqin aholi yashagan.
Hozirda qishloq to‘g‘ridan to‘g‘ri harbiy harakatlar va xavf ostida qolmoqda. Ukraina rasmiylari ushbu hodisa yuzasidan jinoiy ish ochib, tergov harakatlarini boshlagan.
Rossiya Mudofaa vazirligi esa hozircha bu haqda izoh bermagan. Mutaxassislarning fikricha, bunday harakatlar xalqaro huquqni qo‘pol ravishda buzadi.
