Saudiya 24 ming pokistonlikni noqonuniy faoliyat uchun deport qildi
Saudiya Arabistoni hukumati mamlakat hududida noqonuniy tilanchilik bilan shug‘ullangan 24 ming nafar Pokiston fuqarosini deportatsiya qildi. Bu haqda Zamin.uz xabar berdi.
Ma’lum bo‘lishicha, ushbu shaxslar Umra va boshqa turdagi vizalar orqali mamlakatga kirib, keyinchalik uyushgan tilanchilik tarmoqlariga qo‘shilgan. Shunga o‘xshash holatlar boshqa davlatlarda ham qayd etilgan.
Masalan, Birlashgan Arab Amirliklari (BAA) 6 ming nafar, Ozarbayjon esa taxminan 2,5 ming nafar pokistonlikni noqonuniy faoliyat tufayli ortga qaytargan. Ushbu muammo xalqaro miqyosda jiddiy muammoga aylanib borayotgani ta’kidlanmoqda.
Pokiston rasmiylarining ma’lumotiga ko‘ra, tilanchilik ayrim shaxslarning shaxsiy muammosi emas, balki jinoiy guruhlar tomonidan boshqariladigan tizimli faoliyatga aylangan. Bu tarmoqlar orqali odamlar chet elga yuborilib, noqonuniy daromad manbai sifatida ishlatilmoqda.
Pokiston hukumati bu holat mamlakatning xalqaro obro‘siga salbiy ta’sir ko‘rsatayotganini tan oldi. Shu sababli bunday holatlarni bartaraf etish uchun qat’iy choralar ko‘rish zarurligi ta’kidlanmoqda.
