Accor mehmonxonalarida bepul nonushta bekor qilindi
Accor mehmonxona tarmog‘i o‘zining sadoqat dasturi – Accor Live Limitless (ALL) qoidalariga muhim o‘zgartirishlar kiritdi. Bu haqda Zamin.uz xabar berdi.
Bu o‘zgarishlar natijasida Markaziy Osiyo va Kavkaz mintaqalarida Platinum va Diamond maqomiga ega a’zolar bepul nonushta imtiyozidan foydalana olmaydi. Telegram’dagi “Nochnoy porte” kanali ma’lumotiga ko‘ra, ALL dasturining yangilangan shartlari Osiyo–Tinch okeani mintaqasidagi bir qator davlatlarda bepul nonushta siyosatini bekor qilgan.
Bu qaror nafaqat dasturning ishtirokchilari, balki mehmonxona mijozlari orasida ham savollar va munozaralarga sabab bo‘lmoqda. O‘zbekistonda Accor tarmog‘iga kiruvchi bir nechta mehmonxonalar ham ushbu o‘zgarishdan chetda qolmadi.
Xususan, Swissôtel Tashkent, Mercure Tashkent South, Mövenpick Samarkand va Mercure Bukhara Old Town mehmonxonalarida Platinum va Diamond maqomiga ega mijozlar endilikda nonushta uchun alohida to‘lov qilishlari kerak bo‘ladi. Shunga o‘xshash vaziyat Qozog‘istonda ham kuzatilmoqda.
Rixos President Astana, Swissôtel Wellness Resort Alatau Almaty, Mercure Almaty City Center, Novotel Almaty, ibis Astana va ibis Aktobe kabi mehmonxonalar ham yangi qoidalarga amal qiladi. Umuman olganda, Accor’ning bu qarori doimiy sayohat qiluvchi mijozlar uchun kutilmagan yangilik bo‘ldi.
Endi sayyohlar mehmonxona xonalari narxi bilan birga nonushta shartlarini ham oldindan hisob-kitob qilishlariga to‘g‘ri keladi.
