Donesk taqdiri: Ukraina muzokaralarda og‘riqli ssenariylarni tan oldi
AQSH vitse-prezidenti Jey Di Vensning ta’kidlashicha, Ukraina va Rossiya o‘rtasidagi muzokaralar davomida Kiyev vakillari norasmiy suhbatlarda qiyin, ammo real ssenariylarni tan olishga majbur bo‘lmoqda. Bu haqda Zamin.uz xabar berdi.
Vensning so‘zlariga ko‘ra, Ukraina tomoni Donesk viloyati ustidan nazoratni yo‘qotish ehtimolini butkul inkor eta olmayapti. Jey Di Vensning qayd etishicha, rasmiy bayonotlarda Kiyev bu masalani xavfsizlik nuqtayi nazaridan jiddiy muammo deb ko‘rmoqda.
Ayniqsa, Rossiyaning butun Donesk viloyatini to‘liq nazorat ostiga olishi ehtimoli Ukraina uchun eng og‘riqli ssenariylardan biri sifatida baholanmoqda. Shunga qaramay, yopiq muloqotlarda Ukraina vakillari ushbu hududdan ayrilish ehtimolini tan olishayotgani aytilmoqda.
Ularning fikricha, bunday yo‘qotish darhol ro‘y bermasligi, balki 12 oy yoki undan ko‘proq vaqt davomida yuzaga kelishi mumkin. Vitse-prezidentning so‘zlariga ko‘ra, Donbassning taqdiri muzokaralar jarayonidagi eng murakkab masalalardan biri bo‘lib qolmoqda.
Biroq tomonlar o‘rtasida ma’lum ilgarilash kuzatilmoqda. Muzokaralarda avvalgidan farqli ravishda barcha asosiy masalalar ochiq muhokama qilinayotgani va qaysi mavzular muhokama qilinmasligi haqida aniq tushuncha shakllangani aytildi.
Shu bilan birga, Vens tinchlikka erishish masalasida ortiqcha optimizm bildirmadi. Uning fikricha, tinchlikka erishish ehtimoli mavjud, ammo bu amalga oshmasligi ehtimoli ham katta.
Ma’lum qilinishicha, muzokaralar o‘tgan dam olish kunlari Mayami shahrida davom etgan. Rossiya delegatsiyasiga Kirill Dmitriyev boshchilik qilgan bo‘lsa, AQSH prezidentining maxsus vakili Stiv Uitkoff muzokaralarni konstruktiv va samarali deb baholadi.
Ammo suhbatlarning batafsil mazmuni oshkor qilinmadi. Xulosa qilish mumkinki, Donesk masalasi hal qilinmas ekan, tomonlar o‘rtasida yirik kelishuvga erishish yo‘li hanuz qiyin va murakkab bo‘lib qolmoqda.
