Rossiyada mudofaa uskunalari ishlab chiqaruvchi zavod rahbari Vladimir Arsenyev o‘z joniga qasd qilishga urindi. Bu haqda Zamin.uz xabar berdi.
U Moskva markazidagi Qizil Maydonda o‘zini yoqib yubordi. Ushbu voqea uning kompaniyasidagi moliyaviy va ishlab chiqarish muammolari bilan bog‘liq ekani aytilmoqda.
Ma’lum bo‘lishicha, Arsenyev rahbarlik qilgan kompaniya Rossiyaning Ukrainaga qarshi harbiy harakatlari boshlanganidan keyin tank ekipajlari uchun aloqa uskunalari qismlarini yetkazib berishga majbur bo‘lgan. Ishlab chiqarish jarayonini tezlashtirish va topshiriqlarni belgilangan muddatlarda bajarish talab qilingan.
Agar shartnomalar bajarilmasa, hukumat tomonidan jinoiy javobgarlik bilan tahdid qilingan. Biroq kompaniya moliyaviy qiyinchiliklar va boshqaruvdagi muammolar tufayli bankrotlik xavfiga duch kelgan.
2024 yilning iyul oyida Arsenyev shu og‘ir sharoitlar sabab o‘zini yoqib yuborgan. U og‘ir jarohatlar olgan va kasalxonada davolangan.
Bu voqea Rossiyadagi mudofaa sanoati korxonalariga ko‘rsatilayotgan bosim darajasini ochib bermoqda. Zavod hozirda faoliyatini davom ettirayotgan bo‘lsa-da, buyurtmalar hajmi keskin kamaygani va ish jarayonlari qisqartirilgani ma’lum qilinmoqda.
