Karim Benzema Pikassoning asarini sotib oldi

Fransiyalik taniqli futbolchi Karim Benzema dam olish kunlarini Parij shahrida o‘tkazdi. Bu haqda Zamin.uz xabar berdi.

Ushbu safar davomida u aktrisa Lina Xudri bilan birga dunyoning eng mashhur madaniy maskanlaridan biri bo‘lgan «Luvr» muzeyini ziyorat qildi. Sayohat nafaqat madaniy hordiq, balki san’at olamidagi muhim xarid bilan ham esda qoldi.

Xabar qilinishicha, Benzema 1964 yilda mashhur rassom Pablo Pikasso tomonidan chizilgan «Erkak boshi» nomli kartinani sotib olgan. Asar uchun to‘langan aniq miqdor oshkor qilinmagan.

Biroq mutaxassislarning ta’kidlashicha, so‘nggi yillarda Pikasso asarlariga bo‘lgan talab sezilarli darajada oshgan va ayrim asarlar o‘nlab million yevroga baholanmoqda. Shu sababli, Benzemaning ushbu xaridi estetik qadriyat bilan bir qatorda investitsion ahamiyatga ham ega ekani aytilmoqda.

Karim Benzemaning san’atga bo‘lgan qiziqishi muxlislarga avvaldan ma’lum edi. Bu safar u Parijning iliq muhitida, do‘stona kayfiyatda mashhur muzeyni kezib, o‘z kolleksiyasini yana bir qimmatli asar bilan boyitdi.

Ma’lumki, Benzema hozirda Saudiya Arabistonining «Al Ittihod» klubida faoliyat yuritmoqda. U bundan avval ko‘p yillar davomida Madridning «Real» klubi safida o‘ynab, Yevropa futbolida yorqin iz qoldirgan edi.

Tajribali hujumchi 2023 yilda faoliyatini Yaqin Sharqda davom ettirishga qaror qilgan.