Isroil G‘azodan chiqmaydi: Xavfsizlik choralari kuchaytiriladi

Isroil Mudofaa vaziri Isroil Katzning ma’lum qilishicha, xavfsizlik sabablariga ko‘ra Isroil harbiylari G‘azo sektoridan to‘liq chiqib ketmaydi. Bu haqda Zamin.uz xabar berdi.

Vazirning so‘zlariga ko‘ra, ushbu hududda fuqarolar va harbiylardan iborat maxsus birliklar tashkil etish rejalashtirilmoqda. Katz 2023 yil 7 oktabr kuni HAMAS tomonidan amalga oshirilgan hujumni eslab, ushbu voqeadan keyin G‘azoni to‘liq tark etish masalasi kun tartibida emasligini bildirdi.

Uning fikricha, Isroil harbiylari hududda xavfsizlikni ta’minlash va kelgusida shunga o‘xshash hujumlarning oldini olish maqsadida qoladi. Mudofaa vaziri, shuningdek, Nahal deb ataluvchi maxsus birliklar tashkil etilishi haqida ham ma’lumot berdi.

Ularning vazifasi fuqarolarni harbiy xizmatga tayyorlash va ko‘ngillilik asosida faoliyat yuritishni tashkil etishdan iborat bo‘ladi. Ushbu birliklar avval bo‘shatilgan hududlarda joylashtirilishi mumkin.

Shuningdek, Katz G‘arbiy Sohilda o‘tkazilgan tadbirda ham ishtirok etdi va u yerda 1,200 ta uy-joy qurilishi loyihasining boshlanganini e’lon qildi. U hukumat hududiy siyosat va suverenitet masalalariga katta e’tibor qaratayotganini ta’kidlab, bu borada kelgusida aniq qadamlar tashlanishini ma’lum qildi.