Yaponiya fuqarolik olish shartlarini kuchaytirmoqda

Yaponiya hukumati chet elliklar uchun fuqarolik olish shartlarini kuchaytirishni rejalashtirmoqda. Bu haqda Zamin.uz xabar berdi.

Yangi tartibga ko‘ra, fuqarolik olish uchun mamlakatda yashash muddati avvalgi besh yil o‘rniga o‘n yil etib belgilanishi kutilmoqda. Shuningdek, yapon tilini bilish majburiyati ham joriy qilinadi.

Ushbu o‘zgarishlar 2026-yildan kuchga kirishi rejalashtirilgan. Fuqarolik berish jarayonida nomzodning namunali xulq-atvori, 18 yoshdan katta bo‘lishi va barqaror daromad manbaiga ega bo‘lishi talab qilinadi.

Davlat organlariga esa yakuniy qarorni qabul qilishda katta vakolatlar berilishi ko‘zda tutilgan. Ayrim toifalar, masalan, sportchilar va doimiy rezidentlar uchun esa soddalashtirilgan tartiblar joriy qilinishi mumkin.

Nippon Ishin va Sanseito partiyalari yangi qoidalarni yanada qattiqlashtirish, xorijlik rezidentlar sonini cheklash va fuqarolikni bekor qilish mexanizmini joriy etishni taklif etmoqda. 2024-yilda Yaponiya hukumati fuqarolik olish bo‘yicha 12 248 ta arizani ko‘rib chiqdi.

Ularning 8 863 tasi qanoatlantirilgan. So‘nggi o‘n yil ichida mamlakatdagi xorijliklar soni 2,23 milliondan 3,95 millionga yetdi.

Ayrim tanqidchilar bu choralarni ishchi kuchi yetishmovchiligi sharoitida migratsiyaga yangi to‘siq sifatida baholamoqda.