Ronaldu Qizil dengiz orolidan ikki villa sotib oldi
Saudiya Arabistonining "Al-Nassr" klubi hujumchisi va sardori Krishtianu Ronaldu o‘z hayotidagi navbatdagi katta xaridni amalga oshirdi. Bu haqda Zamin.uz xabar berdi.
40 yoshli portugaliyalik futbolchi Qizil dengiz hududida joylashgan Nujuma kurortidan umumiy qiymati 8 million dollarga teng ikkita zamonaviy villani sotib oldi. Ma’lumotlarga ko‘ra, Ronalduning yangi ko‘chmas mulki Qizil dengiz orollaridan birida joylashgan bo‘lib, orol Saudiya Arabistoni materigidan 20 kilometrdan ortiq masofada joylashgan.
Ushbu orolning o‘ziga xos jihati shundaki, unga faqat suv transporti orqali yetib borish mumkin. Bu esa joyning osoyishtaligi, tabiiy muhit bilan uyg‘unligi va xotirjamlik muhiti bilan alohida ahamiyat kasb etadi.
Ronaldu ushbu xaridni tasodifiy emasligini ta’kidladi. U va uning rafiqasi Jorjina Rodriges orolga ilk tashrif buyurgan paytidanoq bu joy bilan o‘ziga xos ruhiy yaqinlikni his qilishganini aytib o‘tdi.
"Birinchi tashrifdanoq Jorjina va men ushbu orolning betakror tabiati va osoyishta muhitiga chuqur bog‘liqlikni his qildik. Bu yer biz uchun tinchlik va halovat topadigan makon bo‘ldi", — dedi Ronaldu o‘z taassurotlari haqida.
Ma’lumki, futbolchi so‘nggi yillarda Saudiya Arabistonida nafaqat sport faoliyatini davom ettirib, balki shaxsiy hayotini ham shu yerda yo‘lga qo‘ymoqda. Nujuma orolidagi ushbu villalar esa uning Qizil dengiz sohillaridagi yangi hayot sahifasining yorqin ramzi sifatida baholanmoqda.
Muxlislar esa bu qarorni Ronalduning Saudiya Arabistonida uzoq muddat qolish niyatining yana bir isboti sifatida ko‘rmoqda.
