Venesuela atrofida harbiy va siyosiy keskinlik kuchaymoqda
Venesuela atrofidagi siyosiy va harbiy keskinlik o‘zining yuqori cho‘qqisiga yetdi. Bu haqda Zamin.uz xabar berdi.
AQSH prezidenti Donald Tramp tomonidan e’lon qilingan "to‘liq blokada" va Karib dengiziga harbiy kemalar yuborilishi bilan Rossiya o‘z diplomatlari va ularning oilalarini Venesueladan evakuatsiya qilayotgani haqida xabarlar paydo bo‘ldi. Bu haqda Associated Press (AP) agentligi Yevropa razvedka manbalariga tayanib ma’lumot berdi.
Unga ko‘ra, Rossiya Tashqi ishlar vazirligi Venesueladagi vaziyatni "umidsiz" deb baholamoqda. Biroq, Moskva bu xabarlarni rad etdi.
Rossiya Tashqi ishlar vazirligi vaziyat nazorat ostida ekanini ta’kidladi va Karakasdagi rossiyalik bolalar uchun tashkil etilgan Yangi yil bayrami suratlarini namoyish qildi. Donald Tramp Venesuela hukumatiga qarshi qattiq choralar ko‘rmoqda.
Vashington Maduro rejimini narkoterrorchilik va noqonuniy neft savdosida ayblab, bir necha iqtisodiy va harbiy qadamlarni tashladi. Jumladan, Venesuelaga kiruvchi va chiquvchi neft tankerlariga to‘liq blokada joriy qilindi, Karib dengiziga harbiy kuchlar safarbar qilindi va xalqaro suvlarda ikkita yirik neft tankeri to‘xtatildi.
Shuningdek, AQSH hukumati Nikolas Maduroni qo‘lga olish uchun 50 million dollar mukofot va’da qilgan. Rossiya esa Venesuelani qo‘llab-quvvatlashda davom etmoqda.
Rossiya Tashqi ishlar vaziri Sergey Lavrov AQSHning iqtisodiy bosimiga qarshi Karakasga yordam berishga tayyorligini bildirdi. Ammo harbiy keskinlik ortib borayotgani Moskvaning Venesueladagi diplomatik missiyasi xavfsizligini xavf ostiga qo‘ymoqda.
Hozirda Oq uy Venesuelada quruqlikdagi harbiy operatsiya o‘tkazish variantlarini ham ko‘rib chiqayotgani aytilmoqda. Bu esa mintaqada yangi yirik mojaroning boshlanishiga olib kelishi mumkin.
