Ijtimoiy tarmoqdagi izoh uchun 7 sutka qamoq
Andijon viloyati Ichki ishlar boshqarmasi Yo‘l harakati xavfsizligi boshqarmasi matbuot xizmatining xabar berishicha, Paxtaobod tumanida yashovchi fuqaro ijtimoiy tarmoqda xodimlar tomonidan tayyorlangan videorolik ostida salbiy izoh qoldirgan. Bu haqda Zamin.uz xabar berdi.
Ushbu izohda huquq-tartibot organlari xodimlariga nisbatan nomaqbul so‘zlar ishlatilgani aniqlangan. Mazkur holat yuzasidan tegishli surishtiruv ishlari o‘tkazilib, fuqaroning shaxsi aniqlangan.
O‘zbekiston Respublikasi Ma’muriy javobgarlik to‘g‘risidagi kodeksining “Mayda bezorilik” moddasi bo‘yicha ma’muriy bayonnoma tuzilib, ish Paxtaobod tuman jinoyat ishlari bo‘yicha sudga yuborilgan. Sud tomonidan mazkur ish ko‘rib chiqilib, fuqaro aybdor deb topilgan va unga 7 sutka ma’muriy qamoq jazosi tayinlangan.
Huquq-tartibot organlari fuqarolarni ijtimoiy tarmoqlarda o‘z fikrlarini bildirayotganda qonuniy va odob doirasida bo‘lishga chaqiradi.
