Rossiya yaqin o‘n yil ichida Oyda elektr stansiyasi qurishni rejalashtirmoqda. Bu haqda Zamin.uz xabar berdi.
Ushbu loyiha Rossiyaning Oy dasturi doirasida amalga oshiriladi va Rossiya hamda Xitoy hamkorligidagi ilmiy tadqiqot markazini elektr energiyasi bilan ta’minlashga qaratilgan. Loyihaning asosiy maqsadi Oyda uzoq muddatli ilmiy faoliyatni yo‘lga qo‘yishdir.
Rossiya davlat kosmik agentligi Roskosmos ma’lumotiga ko‘ra, elektr stansiyasi 2036-yilgacha qurib bitkazilishi rejalashtirilgan. Bu inshoot Oyda harakatlanuvchi texnika, ilmiy kuzatuv uskunalari va boshqa tadqiqot infratuzilmalari uchun barqaror energiya manbai yaratadi.
Stansiyaning aniq texnologiyasi haqida ma’lumot berilmagan bo‘lsa-da, loyihada Rossiyaning yadro energetikasi sohasidagi yirik tashkilotlari ishtirok etayotgani sababli u atom energiyasi asosida bo‘lishi mumkinligi taxmin qilinmoqda. Roskosmos rahbari Dmitriy Bakanovning ta’kidlashicha, Oyda atom elektr stansiyasi qurish Rossiyaning muhim strategik maqsadlaridan biri hisoblanadi.
Mutaxassislarning fikricha, mazkur loyiha Rossiyaning kosmik sohadagi mavqeini mustahkamlashga xizmat qiladi. Hozirda AQSh va Xitoy Oy tadqiqotlarida faol ishtirok etmoqda.
Rossiyaning Oyda doimiy energiya manbai yaratishi esa bir martalik parvozlardan uzoq muddatli ilmiy izlanishlarga o‘tish imkonini beradi.
